ملخص وزن الحدي (القسم التطبيقي)

التاريخ: 06 جمادى الأولى 1448هـ

بطاقة الدرس والوزن

• المقرر: مقرر أوزان ولطم 1448هـ — تلخيص القسم التطبيقي
• السلسلة: سلسلة دروس الأوزان الشعبية للخطباء
• إعداد وتقديم: الأستاذ أبوفاضل المسباع
• الجهة المشرفة: سفينة الحسين (ع) للرواديد والشعراء ومعهد بقية الله لإعداد الخطباء

---

مفتاح وزن الحدي

وزن (الحدي) يُعد من أشهر وأسهل وأعذب الأوزان الشعبية الحسينية المستخدمة في النعي واللطم والقصائد الحماسية والوجدانية، ومفتاحه وتفعيلته الأساسية:

مفتاح وزن الحدي

أسهل وزن وزن الحدي

مُسْتَفْعِلُنْ مُسْتَفْعِلُنْمستفعلن مستفعلن

وزن الحديوزن الحدي

صعدني يمبرج الجدي

---

أمثلة مشهورة من التراث الحسيني

نماذج شهيرة دارجة على ألسن الخطباء والرواديد على وزن الحدي:

أمثلة مشهورة

1

طلع شباب امن الخيم

گومي يزينب هللي

2

يا كربلا يا كربلا

يا ام المصايب والبلا

3

هذا الشهر أجمل شهر

بيه انولد سيد البشر

4

يوم الذي راعي الشيم

أنوى يشد الراحله

5

من هجمت اخيول العدا

ولحدود لمخيّم دنت

6

ام البنين الأربعه

ماتت حزينه املوعه

7

حيدر علي حيدر علي

صوت الموالي يعتلي

---

1. قصيدة: «راعي الشيم» (قصيدة عمودية)

راعي الشيم — الشاعر المرحوم الشيخ مهدي عباد العبايجي

يوم الذي راعي الشيم❖انوى يشد الراحله

جاب المحامل للحرم❖كل فرد وجه حيد إله

طب لعد زينب مبتسم❖عباس راعي المرجله

گال إلها يا مهجة علي❖گومي نريد إلكربله

گالت له خويه محملي❖منهو إلذي يتكفله

گال إلها عيناچ ابشري❖امرچ نود نتمثله

گالت له نعمين الذخر❖بوجودك كل من شي حله

طلعن وعباس يحدي❖والزمل ضج إهلاهله

كل ساعه عباس ونزل❖محمل الحره يعدله

صد للحسين وناشده❖شنهي نزلتك بالفلا

گله يخويه منزلتي❖تدري باختنا مدلله

ما تحمل الذل والهظم❖فطنت على العز والعلا

ريتك يعباس اتحضر❖يوم اطلعت من كربله

سترت وجهها چفوفها❖والدمعه عالخد سايله

رضعانه عندها امگيده❖والنوگ صعبه مهزّله

زينب يسيره بلا ولي❖يا ابا الحسن عيد البلا

ترضى يحيدر شيمتك❖شمر وزجر ابها وله

لو رادت الناقه تعثر❖يضرب بناتك حرمله

الشاعر المرحوم الشيخ مهدي عباد العبايجي (أبو الطبايع):
مهدي بن عبَّاد بن عبَّاس بن عزيز بن محمَّد العبايچي. وُلِدَ العبايچيُّ (عام 1303هـ / 1885م) في طرف البراق في النَّجف الأشرف، في عائلة تمتهن التِّجارة، وقد فقد بصره وهو بعمر 3 سنوات.
📓 مؤلفاته: ألَّف ونظم ديوانًا شِعريًّا موسومًا باسم (مراثي الأمجاد في شِعر بن عبَّاد).
🏴 وفاته: وافاه الأجل المحتوم في يوم الأحد 8 مُحرم الحرام سنة 1380هـ (الموافق 3/ 7/ 1960م).
🕌 مرقده: وُورِي جثمانه الثَّرى في الصَّحن الحيدري الشَّريف في الممر المُؤدي إلى باب القبلة.

---

2. قصيدة: «خيول العده» (قصيدة عمودية)

خيول العده — الشاعر المرحوم السيد عبدالحسين الشرع

من هجمت خيول العده ❖ ولحدود المخيم دنت

طلعت من الخيمه تعدي❖زينب وعالتل اوگفت

شبچت العشره من الخطر❖ولصوب أخوها اتوجهت

صاحت يا بواليمه عدل❖يا روحك الطيبه اظهرت

إن چانك حي انتهض❖وأسرع ترى اسكينه انولت

والخيل هجمت على الخيم❖والنار بيها اتوجّرت

واخواتك بين أهل العدا❖تحذي ويسرها تسلبت

لحگ عليهن يا شهم❖منها الخدور اتهتكت

لمن سمعها ابن الفحل❖بينه الحميه اتفزّعت

گام وعلى وجهه وگع❖ودموع عينه اتهاملت

صاح اشعلمكم يالعرب❖عنكم شيمكم قورت

صاحت يبواليمه عدل❖لوروحك الطيبه اظهرت

---

3. قصيدة: «دنيانه أمست مظلمه» (حدي عمودي مسحوب)

حدي عمودي مسحوب القافية — الشاعر جابر الكاظمي

1- دنيانه أمست مظلمه

2- وانفجعت أملاك السمه

3- يا وسفه يا حامي الحمه

4- وجهك تخضب بالدمه

5- كل المهج متألمه

6- بسيف الهضم متخذمه

7- اعليك العوالم هايمه

8- نار المصايب مضرمه

9- يا قدرة الله وصارمه

10- نهج النبي بيك احتمه

11- اشلون الطغاة المجرمه

12- اتصيبك يا ليث الملحمه

13- يامن إلك قلبي انتمه

14- مثلك على الگاع ارتمه

15- ودمعاتي لمصايبه المؤلمه

16- جددت لوعة فاطمه

17- لجلك دمع عيني همه

18- روحي بمصابك هايمه

---

4. قصيدة: «آنا العليلة فاطمة» (قصيدة عمودية مع ردة)

آنا العليلة فاطمة — الشاعر أبو مهدي الخاطر

آنـا العليلـة فاطمـه ❖ جـدّي النبـي خيـر البشـر
وامـي البتولـه فاطمـه ❖ عنـدي لهـا أفجـع خبـر

عني هلي وسفه ارحلوا❖ودمعي على الخدّ انهمر

بويه عفتني في المرض❖واعظم عليّه هالسّفر

منهو الذي عگبك يحن❖ويمسح عن الـگلب الكدر

منهو يباري حالتي❖وانا آگاسي هالقهر

فراگك يبويه بالگلب❖مثل السهم يفني العمر

ظليت انا بين الحزن❖شيبني وانا في الصغر

كل ليله أنشد نجمتي❖ودمعي يهل مثل المطر

بلغي سلامي للأبو❖وخبري عن الحال الأمر

يا نجمة شفتي إخوتي❖وعمي البطل ذاك الگمر

خبريهم آنا واجده❖گلبي اشتعل مثل الجمر

مشتاگه واذرف دمعتي❖خدّي صبح مجرى النهر

خبّرني يا بويه متى❖ترجع إليّه بالظّفر

يا من سكن وسط الـگلب❖يمتى ترد ما ظل صبر

عيني عمت يا والدي❖لنّك چنت نور البصر

أعتب عليك او انتحب❖رحت وعفتني أحتضر

بعدك يبواليمه يظل❖هذا الندا طول الدهر

(آنـا العليلـه فاطمـة ❖ جـدّي النبـي خيـر البشـر)
(وامـي البتولـة فاطمـة ❖ عنـدي لهـا أفجـع خبـر)

---

5. قصيدة: «جمرة اللوعه» (قصيدة مربعة)

جمرة اللوعه — الشاعر جابر الكاظمي (قصيدة مربعة)

يا شيعتي يا شيعتي ❖ ما تطفه جمرة لوعتي

❖ المقطع 1

هذا آنه ضنوة حيدره❖جدي النبي خير الوره

أُمّي الوديعه الطاهره❖راح أروي حال امصيبتي

❖ المقطع 2

آنه الذي حگي انغدر❖ومن العطش چبدي انفطر

صابوا جبيني بالحجر❖ودم راسي خضّب شيبتي

❖ المقطع 3

هذا الجره اعليّ وسده❖عگب الحجر گوس العده

سهم المثلّث سدّده❖وهالسهم گطّع چبدتي

❖ المقطع 4

عگب السهم هذا الجره❖دامي وطحت فوگ الثره

دارت عليّ الدايره❖والگوم حاطت جثّتي

❖ المقطع 5

ماشفت لن يمي الشمر❖وبيده شهر سيف الغدر

ثنّه وگعد فوگ الصدر❖وابتداه ايحز ابرگبتي

❖ المقطع 6

ابسيف الشمر نحري انگطع❖وفوگ الرمح راسي انرفع

والعسكر اعليّ اجتمع❖وآنه ذبيح ابحومتي

❖ المقطع 7

والخيل اجت متوزّمه❖وسحگت جسم ينزف دمه

لن الضلوع امهشّمه❖ما رحم واحد حالتي

❖ المقطع 8

من بعد ما صدري انهشم❖هجموا عله أيتام وحرم

واتلاهبت نار الخيم❖ما بَگت خيمه لعيلتي

❖ المقطع 9

يمي الجسوم امنثّره❖والجثه مني اموذّره

راحت حريمي اميسره❖هذا السدر من دنيتي

---

6. قصيدة: «ظهري يعباس انكسر» (قصيدة مربعة)

ظهري يعباس انكسر — الشاعر علي عبدالله كويل (تاروت)

ظهري يعباس انكسـر ❖ لَمّن طحت يمّ النهـر

❖ المقطع 1

ياخويه أُجذب ونّتي❖ياحسرتي ياحسرتي

صوّب مصابك مهجتي❖ودلالي ياخويه انفطر

❖ المقطع 2

خَلْني أُشيلك للخيم❖تنتظرك اهناك الحرم

ولو شافت الراس انهشم❖وتشوفه مخسوف الگمر

❖ المقطع 3

هدّتني خويه امصيبتك❖شفتك فجيعه حالتك

سهم الغدر بعوينتك❖وراسك يعباس انطبر

❖ المقطع 5

دمعي اعله فگدك أذرَفَه❖مَگطوعه چفين الوفَه

چاليش ياخويه الجَفَه❖كلّمني يانور البصر

❖ المقطع 6

ياخويه مطبور ابعمد❖بعدك ترى راح السند

مفرود وماعندي أحد❖مكسور من عندي الظهر

❖ المقطع 7

دمعي على اعيونك همى❖خليني أمسح هالدمه

مفجوعه أُمي فاطمه❖وحيدر علي فاس مضر

❖ المقطع 8

بعدك يَابِن خير الورى❖زينب بَگت متحيّره

باچر تروح اميسره❖ونته إليها ماتَحْضَر

---

7. قصيدة: «الفصول الأربعه» (قصيدة موشحة)

الفصول الأربعه — الشاعر السيد عبد الخالق المحنة

شفت الفصول الأربعه ❖ يتجمعن بجسمك سوه
نار ومُطر ماي وضمه ❖ وبشفايفك صفنت هوه

🍂 المقطع 1

فصل الخريف السّلبك عاري و خصومك ناقمه

فصل الربيع بمنحرك ينزف ينابيع الدمه

لكن شتاك ابلا برد ينزل دماك امن السمه

صيفك تميّز بس لهب و اشفافك الذبلت ضمه

بعيونك انشاف العطش.. جسمك عله الرمضه انفرش

ليش انت ما شالك نعش.. واتطشرت مثل الضوه

🍂 المقطع 2

ذابل مثل غصن الورد للغيمه شابح ناظره

راسك يحوم اعله الجسد و الجف يدور خنصره

ليلك و لا شاف النده نار النهار اموجره

من يمتلي جرحك رمل تنزل سمه و تصعد ثره

جم فارس ابجسمك عثر.. كل حافر ايخلي أثر

نايم لجن شفتك سهر.. وي زينب اتساهر سوه

🍂 المقطع 3

المثلك بصدره ذهب و انت اعله صدرك دم طفل

بيك السيوف اتزاحمت و امزاحم اسهام و نبل

واجروحك الما تنحسب واحد عله واحد عدل

و اتلاقن و نزفن سوه بس كل جرح ينزف شكل

وجهك مثل شمس ابرمح.. من كل جهه يشرق صبح

يحسين أشوفنك جرح.. بس دمعة الحبّك دوه

🍂 المقطع 4

يالذابح الماي ابعطش كل شي يروح و ما رحت

من صابك امثلث سهم صاح السهم يا الما صحت

كل السمه وشما حوت يتمنه يوقع من طحت

ياللي نمت بس ابجسد حاكم عله الناس أصبحت

يا مصحف الحب بسملك.. بالطف حبيبك أنزلك

وحي المصايب رتّلك.. موتك حياة القل هوه

🍂 المقطع 5

أربع فصول ابكل سنه و بساعه بيك اتجمعن

يالمنذبح كعبه أصبحت و بجمرة العاشر سعن

يالراشف ارياقك نبي وشكم نبي بيك انطعن

واعيونك الما غمّضن ويه الجسم يتوادعن

دمك مثل سيل انحدر.. يطفح نهر ينسد نهر

وبصدرك اتبين حُفر.. تروي و لا قلبك روه

🍂 المقطع 6

ندري السجود اعله الترب طف اترابه اشتهد

اتوضه من دم منحرك ثم على صدرك سجد

تسبيحة الزهره اشكثر ميه و فرد ندري العدد

ألف و سبعمية جرح تسبيحة اتراب الجسد

نحرك ولاصله قضه.. صمتك خطاب المرتضه

مو شك يغازلها اللظه.. بس اللظه بيها انجوه

🍂 المقطع 7

جنح الهوه يمك صفن ما حرك أوراق الشجر

وجه السمه ووجه الأرض اتلاقن و جسمك ثغر

نومك مثل نوم الجبل يغفه و يفز امن المطر

إبن الخنه ابصدرك رفس وانت ارفست صدر الدهر

حقها البشر لو عشقتك.. واتسودنت بمحبتك

يالغالي حتى بنومتك.. جم فارس و شايل لواه

---

8. قصيدة: «قارورة» (قصيدة موشحة)

قارورة — الشاعر أحمد الذهبي

يقارورة دمه الغالي ❖ على احبابي انشغل بالي
اراقب واني حذرة ❖ الرسايل كلها خطره

🍂 المقطع 1

اول مراسيل الحزن نسمة هوه جايبته الي

مخنوگ اجه بصدري النفس شميته بي ريحة هلي

من والدي جايب عطر مو ذاك عطره الاولي

بي ريحة الفاگد ولد يمكن مشه الاكبر علي

يقارورة واخاف اني تجرحيني بخبر ثاني

واموتن قطرة قطرة الرسائل كلها خطره

🍂 المقطع 2

ثاني رساله من السفر مكتوبه الي بَگطرة دمه

گالتلي عطشان الورد مات النده ويشرب ظمه

عبدالله مو ذاكه الطفل چن والدچ شايل سمه

اترب قرابين العشگ راد الحبيبه يقدمه

رسمتيلي يقارورة مهد خالي بحضن صورة

اثر دم اعلى صدره الرسائل كلها خطرة

🍂 المقطع 3

ثالث مكاتيب البعد هذا اصعب واكثر خطر

يحچيلي سالوفة سمه مَثلومه ويطيح الگمر

من يحضن بروحه الجروح يشبه نهر حاضن نهر

مو ظهر ابويه المنحنى ظهر الزمن كله انكسر

لگاه كاتب على جروحه غلات اخته مثل روحه

طلب زينب تعذره الرسائل كلها خطرة

🍂 المقطع 4

اما الرساله الرابعه لونچ يقاروره اختلف

لون الدمه اتحول الى حنة عريس بلايه چف

والدته ينزف رادته زفوعلى جروحه ونزف

صورة بدر ينزف ضوه اتصورت الاحساس ورجف

وانه روحى يخناجرها مثل رمله ومشاعرها

الحجر بالنوح افطره الرسائل كلها خطرة

🍂 المقطع 5

لحظه وصل من الهجر اصعب مراسيل الالم

شكلچ يقارورة اختلف صار اسود وگلبي انصدم

مستغربه و فكرى انذهل حزنج على رموشى انرسم

ليل الله بحضانچ نزل لو هذا دخان الخيم

جمر غربه وحرگ خيمه وانا بعيني الدمع غيمه

مطر خدودي صحره الرسائل كلها خطرة

🍂 المقطع 6

واخر رساله من النحر گَلبَت موازين الزمن

قارورة الدم امتلت واتبدت وفاض الوطن

صدرك عليه حافر فرس والخد من رمال اندفن

وصفولي بجروحك شمس وجروحي مايتوصفن

على جروحك گمر غافي وانا بروحي نجم غافي

طفه العالم بأسره الرسائل كلها خطرة

🍂 المقطع 7

خلصت رسايلكم هلي ماخلصت بروحي الحرب

وتخيلت رحلة سبي مخطورة وبعيد الدرب

زينب تصد اعله الرمح تلقى الرمح شايل قلب

وآنا اسمع بروحي صدى صوت المتن من ينضرب

سكينه اختي جرح بيها ورقيه بلا تراجيها

وبِچت وحده اعله الأخرى الرسايل كلها خطره